حصلي موقف مرعب على الطريق

زي انهارده من ٥ سنين حصلي موقف مرعب على الطريق ده ، وقتها كنا طالعين نصيف انا وأهلي ولسوء الحظ طلبوني في الشغل علشان موضوع مهم فا اضطريت أجل السفر يوم وطلبت من أهلي يروحوا هما وانا هحصلهم
تاني يوم جهزت حاجتي وخدت عربيتي وتوكلت على الله سافرت ، بس وانا ماشي في نص الطريق وعلى بعد حوالي ٢٠٠- ٣٠٠ متر لقيت في شخص واقف بيشاورلي ، استغربت مين واقف على طريق سفر زي ده ، الجو كان ضلمة والساعة كانت حوالي ٣ بعد نص الليل

كان واضح أن الي واقف ده راجل عجوز، كان باين من هيئته وهو ضهره محني شوية وخصوصا لما نورت في وشه الكشاف وقربت اكتر اتضح فعلاً انه راجل عجوز ، طول المسافة الي بيني وبينه وانا بقرب منه عمال افكر اقف ولا لاء ، مخدتش القرار غير وانا قدامه ولقيت نفسي بدوس فرامل وقفت
فتحت باب العربية وسألته تحب اوصلك فـ حته ؟

من غير ما يرد عليا ركب وقفل الباب وانا كملت الطريق ، فضلنا حوالي ٥ دقايق مستنيه يقولي عاوز ينزل فين بس لقيته مش بيتكلم ، فا سألته انا للمره التانية ، انزل حضرتك فين؟
الغريب ان الراجل مردش بردو ، كررت سؤالي كذا مره على فترات متباعدة وهو مش بيعمل أي حاجة غير أنه باصص قدامه مش بيحرك رقبته ولا بيرمش حتي في اللحظة ديه شكيت انه مش بيسمع او مريض نفسي او بيعاني من أي حاجة
بس فجأة وبعد نص ساعة مشي تقريبًا لقيته اتكلم اخيرًا وقالي : رجعني مكان ما خدتني
استغربت وسألته ، يعني ايه ارجعك؟ انت عارف أحنا مشينا قد ايه ؟ وبعدين ما انت بتتكلم اهوه امال مش عاوز ترد عليا ليه؟

بـ..بس فجأة لقيته بيتكلم بصوت غريب ، كان تخين وخشن عن صوته الي كلمني بيه الأول ، ولقيته بيقولي
– رجعني المكان الي مت فيه
– نعم ؟ انت بتقو….
لفيت رقبتي ناحيته وانا مستغرب من الكلمة الي قالها عشان اشوف قدامي وشه عبارة د..م بيسيل نازل على هدومه وكدمات زرقة و اسنانه وبوقه شبه متهشمين عكس المنظر الي شوفته بيه اول ما ركب
من الصد..مة دوست على الفرامل على الآخر و العربية فضلت تلف بيا في نص الطريق ولولا ستر ربنا كانت هتتقلب ، اول ما اتحكمت فيها و وقفت بصيت اتأكد من الي عيني شيفاه لقيته اختفي ، محدش قاعد جنبي
انا من صد.متي فضلت باصص على الكرسي ومبرق لدرجة اني محستش بنفسي ولا بالوقت غير لما لقيت النهار بدأ يطلع ، اتحركت بالعربية وانا مش فاهم حاجة ، هو الي حصل ده حقيقي ولا كان بيتهيألي!! فضلت طول الطريق اقرأ قرآن واذكار لحد ما وصلت الفندق الي أهلي حاجزين فيه
كنت في حالة صعبة بتمني إن الي حصل فعلا يكون مجرد تهيؤات ، بسرعة فتحت النت وبدأت ادور عن اي حاجة توضحلي الي حصل ده كان حقيقي ولا لاء ، عشان الاقي خبر على واحدة من الجرايد بيتكلم عن حادثة
حادثة حصلت على الطريق ده في نفس المكان من ١٠ سنين، التفاصيل بتقول أن كان فيه راجل عجوز نزل يشوف العطل الي في عربيته ، عشان فجأة تيجي عربية بسرعة جنو_نية وأكيد الي كان سايق مكنش في وعيه ، لأنه داس على الراجل العجوز وهرب ، موقفش حتي
المواصفات بتاعت الراجل العجوز في الخبر هي نفس مواصفات وشكل الراجل الي ركب معايا ، حتي وصف شكل وشه بعد الحادثة هو نفس الي شوفته بيه وهو قاعد جنبي
م..مبقتش مصدق الي بقرأه ، كنت في حالة ذهول ، عشان كده بنصح اي حد ، لو قابلت راجل عجوز واقف على الطريق ده بيشاورلك أوعي تقف ابدًا